Կին եվ տղամարդ

Յուրաքանչյուր մարդ անկրկնելի է և ինքնատիպ: Ինչպես որ չկան երկու իրար նման տերևներ, այնպես էլ չկան երկու իրար նման մարդիկ: Այնուամենայնիվ, կնոջ և տղամարդու միջև եղած տարբերություններն առավել ցայտուն են և, հավանաբար, ավելի հետաքրքրական: Տարբեր են անգամ միևնույն անունն ունեցող ներքին օրգանների աշխատանքն ու հատկությունները` սրտխփոցի հաճախականություն, արյան բաղադրություն, նյութափոխանակություն և այլն...

Պարզվում է, որ հոգեկան կերտվածքի առումով նույնպես կան բազմաթիվ տարբերություններ (հետաքրքրություններ, ընկալման առանձնահատկություններ, ակտիվություն, դիտողականություն, վերլուծելու և գնահատելու ունակություն և այլն):

Նախ նշենք, որ խոսքը վերաբերում է «միջին տիպական» կնոջը և տղամարդուն: Փորձենք առանձնացնել հիմնական տարբերությունները: Աղյուսակում բերված են տղամարդկանց և կանանց առավել զարգացած հատկանիշները:

Ընկալման առանձնահատկությունները

Ընկալման տեսակետից տղամարդու մեջ գերակշռում է տեսնելու հատկությունը: Կնոջ համար ավելի կարևոր է խոսքը, այսինքն այն, ինչ լսում է: Պատահական չէ, երբ ասում են`«տղամարդը սիրում է աչքերով, կինը`ականջներով» :

Ընկալման արագությամբ և հոգեկան ակտիվությամբ կանայք նկատելիորեն գերազանցում են տղամարդկանց: Օրինակ, նրանք ավելի արագ են կարդում, ավելի շատ մանրամասներ են հիշում և փոխանցում, քան տղամարդիկ:

 Ինտուիցիա` ներըմբռնում

Տղամարդն ըմբռնում ու գնահատում է իրավիճակն ամբողջությամբ, կինն ուշադրությունն ավելի շուտ կենտրոնացնում է մանրուքների վրա:

Հետաքրքիր է դիտել, թե ինչպես են, օրինակ, կանայք և տղամարդիկ լուծում գրքի ձեռքբերման հարցը: Վերջիններս (մեծ մասամբ) անպայման կնայեն բովանդակությունը, իսկ կանայք, որպես կանոն, կբացեն մի քանի էջ և կտեսնեն, թե ինչ կա այնտեղ և ստացված տպավորությամբ էլ կորոշեն` գնել, թե ոչ:

Մանրուքների հանդեպ կանանց հետաքրքրասիրությամբ էլ պայմանավորված է նրանց դիտողականությունը, որն էլ ինտուիցիայի աղբյուրն է: «Ես զգում եմ, որ դա այդպես է» փաստարկը կանանց զինանոցից է: Այս նախազգացումը կնոջը հիմնականում չի դավաճանում և եթե ասում է`«ՙես գիտեմ, որ իր հետ որևէ մեկը կա» (նկատի ունենալով մրցակցուհուն), դեպքերի 90%-ում նա ճիշտ է, թեև չի կարող այն ապացուցելու որևէ փաստարկ բերել: Դեռ Ռ.Քիիմենգն էր նշում.«Կնոջ կռահելու կարողությունն ավելի ճշգրիտ է, քան տղամարդու ինքնավստահությունը»:

Մանրուքների և մանրամասների նկատմամբ կանանց մեծ ուշադրությունը խանգարում է նրանց նկատելու հիմնականը: 

Մյուս կողմից` թեստավորման արդյունքներից պարզվել է, որ տրամաբանական մանրակրկիտ վերլուծության դեպքում կանայք դիպուկ խոսքով չեն զիջում տղամարդկանց:

Դիտողականություն 

Առավել սթրեսային կամ վտանգավոր իրավիճակներում   կինն ավելի շուտ է շփոթվում և կորցնում այդ հատկությունը, մինչդեռ տղամարդու ուշադրությունը սրվում է:

Կանայք ավելի արագ և հեշտությամբ կարող են հասկանալ` ելնելով մարդու միմիկայից, շարժմունքից, հայացքից, որն էլ նրանց նուրբ ինտուիցիայի գաղտնիքն է: Արդյունքում ստացվում է, որ տղամարդուն շատ դժվար է կնոջը խաբելը, իսկ կինը տղամարդուն հեշտությամբ կարող է խաբել: Եթե կինը չի արտահայտվում այդ մասին, չի հետևում, թե նա կասկածներ չունի: Շատ հաճախ կինը լռում է, որովհետև վախենում է հարաբերությունները սրելուց:

Խառնվածք

Հոգեբանների դիտարկումները վկայում են, որ տղամարդկանց շրջանում ավելի հաճախ են հանդիպում խոլերիկ խառնվածքով մարդիկ: Հենց նրանց է բնորոշ կամային հակազդումների, համառության/ինքնավստահության, էներգիայի, անհամբերության հստակ արտահայտումը: Տղամարդը սովորաբար ավելի շատ աչքի է ընկնում արտաքին ագրեսիվությամբ, համառությամբ և կոպիտ ճնշմանը դիմադրելու կարողությամբ: Հենց այդ պատճառով էլ խոլերիկ խառնվածքը կարելի է դիտարկել որպես «տղամարդուն բնորոշ (տղամարդկային, առնական) խառնվածք»: 

Կանանց ավելի շատ համապատասխանում են սանգվինիկ և մելանխոլիկ խառնվածքները: Նրանք շարժունակ են, զգացմունքային, փոփոխական տրամադրությամբ: Որպես կանոն, կինն ագրեսիվ է դառնում, եթե իրեն դժբախտ է զգում: 

Տղամարդկանց վճռականությունը և ռիսկի դիմելու հակվածությունը լրացվում է կանանց զգուշավորությամբ, կոպտությունը` նրբանկատությամբ, անտարբերությունը (անփութությունը) կենցաղային մանրուքների հանդեպ գեղագիտական (էսթետիկ) բարձր պահանջներով:

Տղամարդիկ սիրում են, երբ հաջողվում է արտահայտել իրենց կամքը, դիմացկունությունը, ուժն ու «կամային այլ որակները» կամ զուտ ինտելեկտուալ ընդունակությունները, այն դեպքում, երբ կանայք ձգտում են հումանիտար ոլորտին, այն ամենին, ինչ վերաբերում է մարդուն և իր ներաշխարհին:

Հուզականություն

Կանանց բնորոշ է հուզականությունը: Սովորաբար տղամարդիկ կարողանում են զսպել սեփական հույզերը, իսկ դա կնոջից պահանջելն անիմաստ է: Կանանց տրամադրության փոփոխությունները (անկումներն ու վերելքները) հսկայական են: Հայտնի ասացվածք է` «Սիրող կինը երկնքից իջած հրեշտակ է» կամ «Չար կնոջ համեմատ սատանան անմեղ մանկիկ է»:

Կանայք ավելի բուռն են արձագանքում խրախուսանքներին և պատիժներին, ավելի ցավագին են հակազդում բախումներին (կոնֆլիկտներին) ու անհաջողություններին աշխատավայրում և տանը: Կինը ծիծաղում է, երբ կարող է, և լացում` երբ ցանկանում է: 

Կանանց մոտ գերակշռում է իրադարձությունների նկատմամբ հուզական վերաբերմունքը: Բավական լավ է զարգացած նրանց երևակայությունը, ֆանտազիան, որի արդյունքում երբեմն այնպիսի մտահղացումներ են ծնվում, որոնցից տղամարդը կարող է միայն անսպասելիորեն ցնցվել: Կանանց ֆանտազիաները շատ են օգնում ինքնագովազդման և խնդիրներին օրիգինալ լուծումներ տալու հարցում: 

Կանայք ավելի հաճախ են փոխում դեմքի արտահայտությունն ու կարող են արտահայտել մի քանի տասնյակ տարբեր զգացմունքներ (հույզեր): Տղամարդկանց մոտ, որպես կանոն, միայն երկուսն են արտահայտվում` զզվանքն ու անտարբերությունը: Առանձնապես արտահայտիչ են կանանց շրթունքների անկյունները:

Անհրաժեշտ խորհրդատվություն ստանալու համար կարող եք զանգահարել 26-35-43 հեռախոսահամարով:

Հարցեր, պատասխաններ, մեկնաբանություններ